Nakurat ang usa ka 26-anyos nga babaye sa Mexico human masuta nga ang metal nga septum piercing nga iyang gihunahuna nga nawala, nasulod diay sa iyang baga. Si Monica Deyanira Cabrera Barajas, nga usa ka TikToker, nagpakonsulta sa doktor tungod sa ubo nga wala mohunong sulod sa hapit usa ka bulan. Sa iyang X-ray, nakita ang piercing sulod sa iyang baga.
Gituohan ni Monica nga natangtang lamang ang iyang septum piercing samtang natulog siya. Apan wala niya mahibaloi nga nahulog kini sa iyang tutunlan ug nasuyop niya. Mas delikado pa, gikataho nga ang metal nga piercing anaa lamang sa gilay-on nga 0.5 millimeter gikan sa aorta, ang dakong ugat nga nagdala sa dugo gikan sa kasingkasing.
Kinahanglan siyang operahan dayon, apan wala makuha ang piercing sa unang operasyon tungod kay napilit na kini sa tisyu. Malampuson kini nga natangtang sa ikaduhang operasyon. Matud sa mga doktor, mahimong mosangpot sa seryosong komplikasyon ang maong insidente kung mabuslot ang baga o aorta. Human sa maong kasinatian, miingon si Monica nga dili na siya magbutang pag-usab og septum piercing
Photo courtesy: NYpost
