Padayon nga gipalig-on sa Mati City Police Station ang kampanya batok sa ilegal nga droga pinaagi sa aktibong pag-apil sa Information Drive on Children in Conflict with the Law ug Anti-Illegal Drug Abuse Awareness nga gipasiugdahan sa Barangay Council sa Barangay Matiao niadtong nakalabay nga adlaw.
Gipangunahan sa Women and Children Protection Desk (WCPD) ang maong kalihokan ug gipasabot ngadto sa mga partisipante ang makadaot nga epekto sa ilegal nga droga ug mga silot ug multa nga mahimong atubangon sa usa ka tawo nga malambigit niini.
Muabot sa kapin 200 ka mga kabatan-onan sa Barangay Matiao ang miapil sa maong kalihokan. Samtang gipahigayon usab ang pakigtambayayong sa Barangay Council for the Protection of Children kauban ang mga kawani sa City Social Welfare and Development Office (CSWDO) ug City Health Office sa lokal nga panggamhanan sa Dakbayan sa Mati.
Kini nga lakang kabahin sa padayon nga paningkamot sa kapulisan aron mapalambo ang kahibalo sa mga kabatan-onan ug mapalig-on ang ilang partisipasyon alang sa luwas ug drug-free nga komunidad.
Photo courtesy: Mati CPS
