Personal nga nahinabi sa Juander Radyo Mati Team si Ret. PCol Danilo G. Mendoza, CADAC Action Officer, diin iyang gipadayag ang mga programa nga gitutokan karon sa City Anti-Drug Abuse Council kun CADAC.
Matod pa ni Mendoza, padayon ang ilang profiling sa mga Person Who Use Drugs kun PWUDs, ilabina sa mga barangay sa Lanca, Luban ug Cabuaya. Kabahin niini ang pag-ila ug pag-assess sa kahimtang sa mga apektadong indibidwal aron matino ang angay nga intervention ug programa alang kanila.
Sabay sa maong lakang ang pormal nga pag-abli sa Community-Based Rehabilitation Program, nga gitumong sa paghatag og higayon sa mga PWUDs nga makadawat og hustong suporta ug tabang alang sa ilang pagbag-o ug pagbalik sa normal nga panginabuhi.
Dugang pa ni Mendoza, tumong sa administrasyon sa dakbayan nga matabangan ang mga indibidwal nga nalambigit sa paggamit sa ilegal nga droga pinaagi sa rehabilitasyon ug mga programa nga makatabang kanila sa pagbalik sa hustong dalan ug pagpakigbahin pag-usab sa komunidad.
