Usa ka talagsaong estatwa sa gawas sa German Parliament ang nagpakita sa usa ka bag-ong representasyon ni Lady Justice, diin gihulagway siya isip usa ka mabdos nga babaye nga adunay unom ka bukton.
Ang estatwa gihimo sa artist nga si Stefanie Gornicki ug gipadayag sa advocacy group nga Mutterschutz für Alle!, o “Maternity Protection for All!”
Sa iyang unom ka kamot, nagkupot siya og nagkalain-laing butang sama sa bata, laptop, cellphone, kalendaryo, bag ug timbangan, nga nagsimbolo sa daghang responsibilidad nga sagubangon sa mga inahan.
Tumong sa maong artwork ang pagrepresentar sa kahimtang sa mga self-employed nga inahan nga wala makadawat og igo nga proteksyon sama sa maternity leave.
Gipakita usab niini ang kalisod sa pagbalanse sa trabaho, pag-atiman sa pamilya ug uban pang responsibilidad sa panimalay, ilabi na alang sa mga inahan nga kinahanglan magdala sa daghang buluhaton sa samang higayon.
Apan labaw pa sa pagpakita sa kakulang sa suporta ug proteksyon, ang estatwa nagsimbolo usab sa kusog ug kalig-on sa mga inahan nga padayon nga nag-atubang sa daghang responsibilidad matag adlaw.
Photo Courtesy: Linkedln
