Magpagawas pa og nahibiling suplay sa liquefied petroleum gas (LPG) ang gobyerno ngadto sa mga local nga retailers, nga posibleng ibaligya sa P60 kada kilo. Matud ni Energy Secretary Sharon Garin, ang mga stocks nga giprocure sa Philippine National Oil Company (PNOC) ipagawas aron dili na magdugay sa storage ug modugang pa ang gasto sa pagtipig.
Segun pa, mga 21 mil metric tons nga LPG gikan sa United States ang nadawat sa gobyerno niadtong Mayo. Niadtong Hulyo, nagsugod na ang PNOC sa pagpagawas sa LPG inventory sa presyo nga P68.72 kada kilo.
Matud sa DOE, wala pa’y plano nga mag-order og dugang suplay tungod kay igo pa ang kasamtangang imbentaryo. Gilauman nga pinaagi sa dugang pagpagawas sa government stocks, makatabang kini sa pagpalig-on sa suplay ug pagpugong sa pagsaka sa presyo sa LPG sa merkado.
Photo Courtesy: Philippine News Agency
