Mokabat sa 72 ka tawo ang nadakpan sa mga kapulisan sa nasud sa Indonesia tungod sa ilang giingong kalambigitan sa mga sunog sa kalasangan ug peatland nga hinungdan sa makapahasol nga aso sa pipila ka bahin sa nasod.
Matod sa otoridad, giimbestigahan ang mga suspek kalabot sa 89 ka kaso sa forest ug land fires sa lima ka probinsya sa Borneo ug upat sa Sumatra. Kadaghanan kanila giakusahan nga tinuyo nga nagsunog sa yuta aron mas barato ang paglimpyo alang sa mga plantasyon.
Gisusi usab sa mga imbestigador ang mga rekord pinansyal aron masayran kung adunay mga kompanya nga nagpondo o nagsugo sa pagsunog. Ang mga suspek mahimong mag-atubang og dagkong multa ug hangtod 15 katuig nga pagkabilanggo kung mapamatud-an ang ilang sala.
Samtang, mibisita si Indonesian President Prabowo Subianto sa Central Kalimantan diin kapin 7,600 ka ektarya na ang nasunog. Gimando niini, ang pagpadala og dugang resources sama sa helicopters ug water pumps aron mapugngan ang pagkaylap sa sunog ug aso.
Photo courtesy: The New York Times
