Patay ang usa ka indibidwal ug pipila pa ang nasamdan human sa insidente sa usa ka rollercoaster sa Six Flags Over Georgia amusement park sa estado sa Georgia, Estados Unidos. Giimbestigahan na sa kapolisan sa Cobb County ang insidente nga nahitabo 24 kilometros gikan sa Atlanta.
Wala pa matino sa mga awtoridad ang hinungdan sa pagkamatay sa biktima ug wala usab gikumpirma kon unsang sakyanan sa parke ang nalambigit. Apan, sa mga hulagway gikan sa news helicopter, makita ang Goliath rollercoaster nga mihunong sa tunga sa riles samtang gitabangan sa mga trabahante ang mga pasahero sa pagkanaog.
Adunay mga saksi nga miingon sa lokal nga media nga nakakita sila sa usa ka lalaki nga natagak gikan sa rollercoaster ngadto sa atop sa usa ka haunted house attraction. Apan, wala pa mapamatud-i ang maong mga taho. Miingon ang pamunuan sa parke nga nakigtambayayong sila sa mga awtoridad alang sa imbestigasyon.
Ang insidente nahitabo pipila lang ka semana human gipahibalo sa usa pa ka parke sa Six Flags sa habagatang California ang paghunong sa operasyon sa X2 rollercoaster, human kapin sa 100 ka indibidwal ang gikataho ang nakasinati sa grabeng nerbyos tungod sa pagsakay niini.
Matod sa kompanya, nakapasar ang maong sakyanan sa mga pagsulay sa kaluwasan, apan nakahukom silang undangon ang operasyon niini.
Photo Courtesy: Life Through the Headlines
