Nadakpan sa kapulisan sa Sawang Calero Police Station 6 sa Cebu City Police Office (CCPO) ang usa ka 48-anyos nga babaye nga suspek sa pagpangawat sa Taboan Dried Fish Market, Barangay San Nicolas Proper, Dakbayan sa Sugbo.
Base sa report, nailhan ang suspek pinaagi sa CCTV footage. Narekober usab gikan sa iyang posisyon ang giingong gikawat nga iPhone 16 Pro Max nga nagkantidad og ₱85,000.
Gidala ang suspek sa detention facility sa Sawang Calero Police Station 6 samtang gihuman ang mga dokumento ug giandam ang tukmang reklamong kriminal batok kaniya.
Gidayeg ni PMAJ Noah Labra Añana, station commander sa PS6, ang mga personahe tungod sa ilang paspas nga pagtubag ug paningkamot nga misangpot sa dali nga pag-ila ug pagkadakop sa suspek.
Gipasalig sa Sawang Calero Police Station 6 ang padayon nga pagpalig-on sa pagpatuman sa balaod, pagpugong sa krimen ug pagpanalipod sa komunidad.
Photo Courtesy: PNP Cebu City Police Office
