Magtinabangay ang Technical Education and Skills Development Authority (TESDA) ug Department of Agriculture (DA) aron makahimo og mga skilled ug certified urban agriculture practitioners sa nasud pinaagi sa National Urban and Peri-Urban Agriculture Program (NUPAP) sa Bureau of Plant Industry (BPI).
Tumong sa programa nga tudloan ang mga partisipante og praktikal nga kahibalo bahin sa modernong produksyon sa pagkaon nga makatabang sa pagpalig-on sa food security ug climate resilience sa Pilipinas. Pinaagi sa maong programa, gilauman nga makabaton ang mga partisipante og mga kahanas nga magamit alang sa pagpangita og trabaho, pagpatukod sa kaugalingong negosyo ug paghimo og community-based food production sa ilang mga lugar.
Aron mas mapalapad ang access sa publiko, magtukod ang TESDA ug DA og mga technology demonstration hubs sa nagkalain-laing komunidad sa nasud. Gipasiugda usab sa duha ka ahensya ang pagpalig-on sa kapasidad sa mga trainer, assessor ug partner institutions aron masiguro ang kalidad sa training ug certification program.
Samtang ang TESDA Complex sa Taguig mahimong flagship Urban Agriculture Technology Demonstration and Training Center sa maong programa. Dinhi hatagan ang mga partisipante og hands-on exposure sa mga modernong pamaagi sa urban agriculture ug food production. Ang training ug certification program pagapangunahan sa TESDA Green Technology Center (GTC) isip kabahin sa paningkamot nga mapalambo ang green skills ug modernong pamaagi sa agrikultura.
Gilauman nga pinaagi sa pakigtambayayong sa TESDA ug DA, mas daghang Pilipino ang mabansay ug ma-certify sa urban agriculture ug mahimong kabahin sa pagpalig-on sa suplay sa pagkaon, pagmugna og panginabuhian ug pagpalambo sa climate-resilient nga mga komunidad.
Photo Courtesy: Philippine News Agency
