Arestado ang duha ka lalaki human sila naaktuhan nga nagpahigayon og “pot session” sulod sa usa ka panimalay sa Purok 3, Barangay Maygatasan, Dakbayan sa Bayugan, Agusan del Sur, niadtong Sabado sa gabii, Agosto 22, 2026.
Naila ang mga dinakpan nga sila si alyas “Richard,” 21 anyos, usa ka mag-uuma, ug alyas “Vantol,” 46 anyos, usa ka abantero sa Mabitay. Ang duha pulos residente sa Purok 2, Barangay New Tubigon, Sibagat, Agusan del Sur, ug midayo lamang sa maong dapit.
Sumala sa taho sa kapulisan, gipahigayon ang operasyon bandang alas 10:15 sa gabii sa panimalay nga gipanag-iyahan sa usa ka alyas “Emon.” Upat ka indibidwal ang anaa sa sulod sa balay niadtong tungora, apan daling nakasibat ang laing duha ka kauban, lakip na ang tag-iya sa balay.
Sa gihimo nga pagrekisa, narekober sa mga awtoridad ang duha ka pakete sa gidudahang shabu, usa ka inablihang sudlanan sa shabu nga adunay mga aluminum foil ug tooter, tulo ka lighter nga walay ulo ug Cash nga nagkantidad og ₱7,000.
Sa pamahayag sa duha ka mga dinakpan, ilang gipadayag nga unang higayon pa lamang nila nga nakaabot sa maong dapit tungod kay giubanan sila sa usa ka alyas “Guko.” Kasamtangan, temporaryong nagtingkagol sa selda sa kapulisan ang mga suspetsado. Sila mag-atubang og kasong kalapasan sa Republic Act 9165 o ang Comprehensive Dangerous Drugs Act of 2002.
Photo courtesy: Melver A. Sabando
