Gipasalig sa lokal nga pangagamhanan sa Dakbayan sa Mati nga sundon ang tanang environmental requirements ug kuhaon ang gikinahanglang mga clearance sa dili pa ipadayon ang mga proyekto sama sa MFGR Baywalk and Waterpark Extension ug Mati Integrated Fishport Complex.
Nahisgotan kini atol sa 4th Quarter Regular Protected Area Management Board (PAMB) Meeting, diin gihisgotan ang mga lakang aron masiguro nga matuman ang mga lagda sa pagpanalipod sa kalikupan. Gihatagan usab og pagtagad sa miting ang resulta sa tulo ka bulan nga pagsulay sa regulated swimming sa Guang-Guang Mangrove Nature Reserve Park.
Sumala sa gipresentar sa City Environment and Natural Resources Office (CiENRO), lakip sa mga lakang nga gipatuman ang pagtakda sa mga lugar nga gitugotan sa paglangoy, pagpalig-on sa mga pamaagi sa pagsiguro sa kaluwasan, ug padayon nga pagpakig-estorya sa mga hingtungdang sektor. Mitambong sa maong panagtigom ang mga representante sa DENR-PENRO, BFAR XI, Davao Oriental State University (DORSU), ug nagkalainlaing opisina sa lokal nga pangagamhanan sa Mati, uban sa pagpangulo ni Office of Civil Defense (OCD) Regional Director Ednar G. Dayanghirang.
Pinaagi sa maong panag-uban, gihatagan og higayon ang mga ahensiya nga hisgotan ang mga lakang alang sa hapsay nga pagpatuman sa mga proyekto ug sa pagmintinar sa kaluwasan ug pagpanalipod sa mga lugar nga adunay kahinungdanong ekolohikal.
Photo courtes: LGU Mati
