Napakyas ang Gilas Pilipinas Boys bisan pa sa kusog nga pakigbisog ni Chog Moral, sa ilang paningkamot nga makasulod sa semifinals human sila mapildi sa mas taas ug lig-on nga koponan sa China, sa final score nga 117 vs 103, sa quarterfinals sa 2026 FIBA Under-18 Asia Cup nga gipahigayon sa Veer Savarkar Indoor Stadium sa Ahmedabad, India.
Tungod sa kapildihan, natapos ang kampanya sa Gilas Boys alang sa usa ka puwesto sa 2027 FIBA Under-19 World Cup. Bisan napugos ang mga Pilipinong magdudula sa dako nga kahabogon sa mga Chinese players, nakahatag gihapon og impresibong performance si Moral kinsa nakapuntos og 26 ug unom ka steals.
Sa unang duha ka quarters, nakapakita og kusog ang Gilas Boys ug nakigsukol sa China. Apan, napadayon sa China ang ilang kusog nga opensiba ug nakakuha og 14-point lead, sa score nga 59 vs 45, sa pagtapos sa unang bahin sa duwa.
Dugang suporta alang sa Gilas ang gihatag ni Luke Atacador nga adunay 14 puntos, samtang nakapuntos og 12 matag usa sila Ethan Aguas ug JB Cagurungan.
Si Aidan Green usab nakatampo og 11 puntos alang sa Gilas Boys nga gipangulohan ni coach Juno Sauler. Sa bahin sa China, nanguna sa ilang opensiba si Wang Zichao nga adunay 23 puntos ug upat ka assists.
Bisan wala na makasulod sa semifinals, mopadayon gihapon sa pagdula ang Gilas Boys alang sa 5th-8th classification phase. Gilauman usab nga malabwan sa Gilas Boys ang ilang ika-10 nga puwesto sa edisyon sa maong torneo.
Photo Courtesy: Spin ph
