‎”SPIDERMAN” SIKOP SA BUY-BUST HUMAN MISAKA SA ATOP UG NITAGO SA KISAME

Napakyas ang plano sa usa ka 39-anyos nga lalaki nga nailhan sa alyas nga “Oman” o “Spiderman” nga makalikay sa kapulisan human kini misaka sa atop sa usa ka balay ug mitago sa kisame atol sa buy-bust operation sa Barangay Calong-calong, Toledo City, Cebu.
‎
‎Nasikop ang suspek alas 2:13 sa hapon niadtong milabay’ng adlaw, atol sa operasyon nga gipahigayon sa kapulisan. Sumala sa mga awtoridad, nakasol-ob og full attire nga spiderman suit ang dinakpan, nga sumala pa nya, usa sa iyang mga giidolo nga superhero, apan, ang spiderman nga naandan sa katawhan nga usa ka superhero, nahimong suspek sa droga.
‎
‎Nakumpiska gikan kang spidey ang lima ka sachet sa gidudahang shabu nga may kinatibuk-ang gibug-aton nga mga 0.56 gramos ug gibanabanang kantidad nga P3,808.
‎
‎Gidala na ang suspek sa kustodiya sa Toledo City Police Station ug atubangon ang tukmang mga kasong may kalabutan sa ilegal nga droga.
‎
‎Photo Courtesy: CDN