Gipahigayon sa kasundaluhan ang “AGILAKAD” 2026 sa 10ID isip kabahin sa selebrasyon sa 20th Anniversary sa 10th Infantry “Agila” Division, Philippine Army nga gipangunahan ni Major General Alvin Luzon, commander sa 10ID karong adlawa Agosto 22, 2026.
Gibaklay sa kapin kon kulang usa ka libo ka mga sundalo gikan sa mga Batalyon nga sakop sa nasangpit nga Dibisyon ang 17 kilometro nga gilay-on gikan sa headquarters sa Camp Gen. Manuel T. Yan Sr., Brgy. Tuburan, Mawab, Davao de Oro, ngadto sa Provincial capitol, Brgy., Mankilam, Tagum City.
Sumala ni Major Ruben Gadut, Spokesperson sa 10ID nga tumong sa maong kalihokan ang pagpalig-on sa physical fitness, disiplina, panaghiusa ug camaraderie sa mga personahe.
Personal usab kining gitambongan ni Governor Edwin I. Jubahib sa Davao del Norte, isip suporta sa padayong pagmintinar sa kahapsay ug kalinaw sa lalawigan tungod sa pagkagawasnon niini sa insurhensiya pipila ka tuig na ang nilabay gumikan sa panagtambayayong nga paningkamot sa mga opisyales ug personahe sa 10th Infantry “Agila” Division ug mga nagkadaiyang lokal nga panggamhanan lakip na sa katawhang Dabaonon.
