nakadawat og tubag ang usa ka babaye sa England sa iyang job application letter, apan ang nakapakurat, 48 ka tuig pa ang milabay. Si Tizi Hodson taga-Gedney Hill, Lincolnshire, England, nagpadala og application letter niadtong Enero 1976 aron maka-apply isip motorcycle stunt rider. Apan wala gyud siya makadawat og tubag gikan sa kompanya, maong sulod sa daghang katuigan, naglibog siya kung nganong wala siya tawagi o gi-interview.
Hangtod niadtong Oktubre 2024, kalit siyang nakadawat og sulat gikan sa post office. Ug ang sulod niini ang iyang application letter nga iyang gipadala 48 ka tuig na ang milabay. Sumala sa nota nga gilakip sa sulat, wala kini ma-deliver ngadto sa kompanya tungod kay naipit o nabilin kini sulod sa usa ka drawer sa post office sulod sa daghang katuigan.
Sa dihang nadawat ni Tizi ang iyang karaang application, didto na niya nasabtan ang misteryo kung nganong wala gyud siya nakadawat og tubag sa iyang aplikasyon. Bisan pa sa dugay nga pagka-delay sa iyang sulat, wala niya biya-i ang iyang pangandoy. Nagpadayon siya sa iyang career isip motorcycle stunt rider ug nakatrabaho sa lain-laing nasod.
Nahimo usab siyang snake handler, horse caretaker, aerobatic pilot ug flying instructor. Makalilisang man ang kadugay sa tubag, apan para kang Tizi, importante gihapon nga nakabalik sa iyang kamot ang application letter nga iyang gisulat hapit tunga sa siglo ang milabay.
Photo Courtesy: The Guardian
