Nag-viral online ang usa ka 52-anyos nga negosyante sa South Korea tungod sa iyang batan-on nga dagway ug talagsaong fashion style. Giila siya nga si Lee Hyo Jong, nga natawo niadtong 1973. Nahimong sentro sa atensyon sa mga netizens ang iyang mga litrato human kini gipatik sa The Qoo, usa ka online bulletin board sa South Korea.
Si Lee mao ang tag-iya sa London Bagel Museum Cafe sa Gangnam, Seoul, nga nailhan tungod sa mga pastries ug maayong atmosphere. Apan gawas sa iyang cafe business, aduna usab siyay fashion store nga Artist Komplex, ingon man duha pa ka cafes sa Seoul nga Café Highwaist ug Café Layered.
Dugang nga nakapadani sa publiko mao ang iyang estilo sa pamiste nga sagol sa casual, grunge, artsy ug usahay eccentric nga fashion. Daghang netizens ang nakurat sa iyang edad ug nakamatikod sa iyang batan-on nga dagway. Apan imbes gamiton ang iyang viral nga pagkasikat, nagpabilin si Lee nga low profile.
Sumala sa report, dili siya kasagarang modawat og mga imbitasyon alang sa interviews gikan sa traditional media ug social media influencers. Wala usab siya maghatag og komento bahin sa mga pangutana kung unsa ang iyang sekreto sa batan-on nga dagway.
Mas gipunting pa ni Lee ang iyang panahon sa pagdumala sa iyang mga negosyo. Ang iyang istorya nagpakita nga gawas sa iyang fashion style ug viral nga dagway, usa usab siya ka successful businesswoman nga nakamugna og daghang food ug fashion ventures sa Seoul.
Photo Courtesy:Oddity Central
