Dakong kadaogan batok sa Communist Terrorist Group (CTG) ang pagkadakop sa usa sa mga high-value target sa Caraga Region human nadakpan sa hiniusang operasyon sa kapulisan ug militar niadtong gabii sa Agosto 10, 2026.
Ang nadakpan, giila nga si alyas “Neil/Part/Jihad,” 26 anyos, usa ka PSR-listed nga miyembro sa CTG ug kanhi Squad Leader sa RSDG, NEMRC. Giila usab siya isip Caraga Region’s Top 3 Most Wanted Person.
Sumala sa Surigao del Sur Police Provincial Office ubos sa pagpanguna ni Provincial Director PCOL Jeffrey Lawrence D. Mauricio, gilunsad ang intelligence-driven operation alas 10:30 sa gabii sa Purok-5, Logdeck, Barangay San Isidro, Lianga.
Nanguna sa operasyon ang Barobo Municipal Police Station (MPS) ubos sa pagpanguna ni PMAJ Andrew G. Lupian, uban sa suporta sa RIU13 PIT-SDS, 14th SAC, 1SAB PNP-SAF, 41 MICO, 4 MIB sa Philippine Army, 1st SDS PMFC ubos ni PMAJ Magdalino G. Pimentel Jr., ug RID13.
Ang suspek nadakpan pinaagi sa daghang warrant of arrest nga gi-isyu sa Presiding Judge sa Regional Trial Court, 11th Judicial Region, Branch 28 sa Lianga, Surigao del Sur.
Lakip sa mga kaso batok kaniya mao ang: three counts of Murder — walay girekomendar nga piyansa; two counts of Frustrated Murder — ₱200,000 nga recommended bail matag usa; ug Attempted Murder — ₱100,000 nga recommended bail. Atol sa pagdakop, gisunod sa mga operatiba ang standard operational procedures ug gipahibalo sa suspek ang iyang mga constitutional rights.
Sa pagkakaron, anaa na sa kustodiya sa Barobo MPS ang nadakpan alang sa hustong dokumentasyon ug disposisyon, una pa siya iturn-over ngadto sa korte nga nag-isyu sa mga warrant.
Photo courtesy: SDSPPO
