Nadakpan sa mga kawani sa Tagum City Police Station ang usa ka lalaki nga nanguha og mga putol-putol nga bakal sa usa ka compound sa Barangay Visayan Village, Tagum City niadtong Agosto 10, 2026.
Sumala sa Spot Report sa Tagum PNP, mga alas-4:45 sa hapon dihang nasakpan sa aktong pagpangawat ang suspetsado nga giila lamang sa alyas “Jayson,” 18 anyos, ulitawo ug residente sa Purok Bayanihan Lumberan, Barangay Magugpo West, Tagum City. Gikatahong misulod ang suspetsado sa compound sa complainant ug mikuha og nagkalain-laing cut steel o bakal, nga gibanabanang mokabat sa ₱1,000 ang kantidad.
Gidala gilayon ang suspetsado ngadto sa Tagum City PNP sa Mobile Patrol-44, ubos sa pagpangulo ni PCpl Marjun Rementizo, kauban ang complainant nga si alyas K, 34 anyos, ug ang iyang testigo nga si alyas Rod, 60 anyos. Narekober usab sa mga otoridad ang mga putol-putol nga bakal nga giingong gikawat ug gidala sa police station alang sa hustong dokumentasyon ug dugang imbestigasyon. Gipahibalo sa kapulisan ang suspetsado sa iyang mga constitutional rights ug gipailalom kini sa medical examination sa wala pa gibutang sa lock-up cell.
Samtang, nag-andam na ang Tagum CPS sa gikinahanglang mga dokumento alang sa pagpasaka sa tukmang kaso batok sa suspetsado pinaagi sa inquest proceedings.
Photo Courtesy: Eastern Shore Undercover
