Nagpahimangno ang Zamboanga del Sur Police Provincial Office (ZSPPO) sa publiko nga magmatngon batok sa mga indibidwal nga nagpaka aron-ingnon nga mga police officer aron makakuha og sensitibo ug operational nga impormasyon.
Kini human nga adunay usa ka wala mailhing indibidwal nga nagpaka-aron-ingnong Deputy Regional Director for Operations sa Police Regional Office 9 nga misulay sa pagpangayo og personal ug operational information gikan sa Molave Municipal Police Station ning bag-o.
Segon pa, gipangayo sa caller ang contact number sa Supply PNCO sa Molave MPS ug nagpakisayod usab kon asa ang pinakaduol nga standby Mobile Force sa Barangay Madasigon, Molave, Zamboanga del Sur.
Apan, namatikdan dayon sa Supply PNCO ang maong tawag ug gireport kini alang sa verification diin akumpirma nga ang mobile number nga gigamit sa caller dili rehistrado sa police official nga iyang gi-impersonate.
Dungan niini, gipahinumduman sa ZSPPO ang publiko nga dili basta muhatag ug mga personal o sensitibong impormasyon sa mga wala ma-verify nga caller ug siguruhon una ang ilang identidad pinaagi sa opisyal nga mga channel.
