Patay ang usa ka babaye human nga giingong gisunog sa iyang bana didto sa Sitio Magum, Brgy. Macambol, Mati City, Davao Oriental pasado alas 3:00 sa kadlawon, niadtong Agusto 11, 2026.
Sumala sa taho nga nakuha sa Juander Radyo Mati Team, naila ang biktima nga si alyas Mary Grace, 42 anyos, usa ka trabahante sa mining, samtang ang suspek usa ka lalaki nga giingong ikalimang bana sa biktima.
Base sa inisyal nga impormasyon, ang biktima gikan naligo ug nakit-an sa suspek dayung gibuboan ug gasolina ug gisindihan nga miresulta sa pagkasunog.
Dali usab nagpakitabang ang biktima sa mga silingan niini ug gidala siya sa pinakaduol nga balay tambalanan ug gilayong gitambalan, apan nahimong kritikal ang kahimtang niini ug pipila ka oras nga milabay nakabsan gihapon kini sa iyang kinabuhi. Gani, gikaingong selos ang hinungdan o motibo sa maong kremin.
Sa pagkakaron padayon pa ang imbestigasyon sa mga otoridad kabahin sa maong insidente.
