Napalgang wala nay kinabuhi ang usa ka mag-uuma human gidunggab sa wala mailang suspetsado sa Purok Paglaum, Barangay Mabuhay, Molave, Zamboanga del Sur, niadtong nakalabay nga adlaw.
Sumala sa inisyal nga imbestigasyon sa kapulisan, aksidenteng nadiskubrehan sa usa ka residente sa lugar ang biktima samtang siya nagdakop sa iyang nakabuhing baka nga nanibsib doul sa lugar diin napalgan ang patay’ng lawas sa biktima.
Dali nga nitaho ang maong concern citizen sa kapulisan nga dali usab nga girespondehan sa kapulisan ug nagpakigatabang Zamboanga del Sur Provincial Forensic Unit alang sa crime scene processing.
Human mapailawom sa post mortem examination ang patay’ng lawas sa biktima, gidala dayon kini sa punerarya aron mapahiluna na sa nagbangutang pamilya.
Padayon pa usab karon ang follow-up investigation sa Molave Municipal Police Station aron mailhan ug madakpan ang responsable sa krimen.
Samtang, gihangyo usab sa kapulisan ang publiko nga adunay impormasyon kabahin sa insidente nga motaho dayon sa pinakaduol nga police station mokontak sa Molave MPS alang sa mas dali nga imbestigasyon.
Photo Courtesy:ZSPPO
