Gipahimangnoan sa Presidential Communications Office (PCO) ang publiko nga mag-amping batok sa leptospirosis ug uban pang mga sakit nga makuha gikan sa kontaminadong tubig, ilabi na nga padayon ang pag-ulan ug ang epekto sa Habagat sa pipila ka bahin sa nasod.
Gipasiugda sa pahimangno ang risgo sa leptospirosis sa mga lugar nga gibaha. Samtang, nagpadayon ang gobyerno sa mga pagpangandam niini, lakip na ang paghatod og luwas nga mainom nga tubig ug uban pang importanteng suplay sa panglawas ngadto sa mga apektadong komunidad.
Ang leptospirosis usa ka impeksyon nga dala sa bakterya ug makuha pinaagi sa pagkaladlad sa tubig-baha o tubig nga kontaminado sa ihi sa mga hayop nga natakdan sa sakit, ilabi na sa mga ilaga. Mas taas ang risgo alang sa mga tawo nga nagbaktas o nag-agi sa tubig-baha, ilabi na kung aduna silay mga samad, garas, o bali sa panit. Sumala sa Department of Health (DOH), ang mga sintomas sa leptospirosis mahimong maglakip sa taas nga hilanat, sakit sa ulo, sakit sa lawas o kaunoran, sakit sa bitiis, pagkapula sa mga mata, pagsuka, sakit sa tiyan o mga lutahan, ug pag-yellow o pagka-dalag sa panit ug mga mata.
Dili kinahanglan nga mogawas dayon ang mga sintomas human maladlad sa tubig-baha. Matod sa DOH, ang mga sintomas mahimong makita paglabay sa pipila ka adlaw o moabot pa og usa ka bulan una kini mogawas. Busa, gitambagan kadtong mga nag-agi sa tubig-baha nga bantayan pag-ayo ang ilang panglawas ug mokonsulta dayon sa doktor o moadto sa pinakaduol nga health center kung makasinati og bisan unsang sintomas.
Adunay mga higayon nga ang mga awtoridad sa panglawas naghatag og doxycycline isip *post-exposure prophylaxis* (tambal nga makapugong sa sakit human maladlad) alang sa mga tawo nga naladlad sa tubig-baha; hinuon, wala kini nagpasabot nga angay kining imnon nga walay pagkonsulta o pagtugot sa doktor. Gipasiugda mismo sa DOH ang panginahanglan sa konsultasyon ug reseta sa dili pa moinom og doxycycline, tungod kay ang angay nga pamaagi sa pagtambal nagdepende sa klase ug lebel sa pagkaladlad sa sakit.
Base sa mga giya sa DOH, adunay nagkalain-laing pamaagi sa pagtambal depende kung ang risgo sa pagkaladlad ubos, kasarangan, o taas. Busa, mas luwas nga mokonsulta una sa health center imbes nga ikaw mismo ang magbuot sa dosis o gidugayon sa pag-inom sa tambal.
Nagpahimangno ang DOH nga likayan ang pag-agi o paglangoy sa tubig-baha kung mahimo. Kung dili gyud malikayan ang pagkaladlad, gamita ang mga proteksyon sama sa botas ug guwantes, siguroha nga limpyo ug uga ang mga samad, ug hugasi dayon gamit ang limpyo nga tubig ang bisan unsang parte sa lawas nga natandog sa tubig-baha. Ang pag-inom og luwas nga tubig ug ang pagmintinar sa kalimpyo sa panimalay ug palibot importante usab aron mamenosan ang risgo sa sakit.
Photo Courtesy: Healthmug
