Ipatuman sa Department of Agriculture (DA) ang importation ban sa mga buhing mga hayop ug mga produktong karne gikan sa pito ka nasod sa posibleng pagkaylap sa Foot-and-Mouth Disease.
Apil sa mga nasod nga gipahamtangan sa import ban ang Azerbaijan, Bahrain, Cyprus, Iraq, Israel, Kuwait ug Palestine, diin adunay natala nga outbreak sa FMD sa mga hayop.
Dili tugotan nga mosulod sa Pilipinas ang mga produkto sama sa skeletal muscle meat, casings, tallow, hooves ug horns, lakip ang buhing baboy, baka ug water buffalo.
Gimando usab sa DA ang dinaliang pagpahunong ug pagkumpiska sa mga shipment nga masakpan sa veterinary quarantine officers o inspectors sa mga pantalan sa nasod.
Matud sa DA, gikinahanglan ang maong lakang aron mapugngan ang pagsulod sa FMD virus ug mapanalipdan ang mga hayop sa Pilipinas nga daling matakdan niini.
Base sa report sa Food and Agriculture Organization (FAO), nakumpirma ang outbreak sa FMD serotype SAT1 sa maong pito ka nasod pinaagi sa mga laboratory, uban sa koordinasyon sa mga international animal-health organizations.
