Subling gipahinumdom ngadto sa hawanan sa konseho nga palig-unon ang pagpangandam batok sa katalagman partikular na nga makalikay sa sunog ug palig-unon ang pagresponde sa kabarangayan.
Kini ang nahimong unod sa special report ni Konsehal Roger Abaday, kinsa chairman sab sa committee on public order and safety ug gihangyo ang mga hingtungdang komitiba nga tutukan kini nga inistyatiba labi na nga sunod-sunod ang nahitabong sunog dinhi sa dakbayan sa Cagayan de Oro.
Gipunting sab ni Konsehal Abaday, nga importanteng lig-on ug fully operational ang response system, uban sa mga barangay personnel nga andam sa pagresponde sa panahon sa emerhensya. Ipadayon usab ang regular drills aron mapalambo ang kahibalo, koordinasyon ug kaandam sa mga responder. Siguruhon usab nga operational ang mga equipment nga gamiton sa mga operasyon aron malikayan ang kalangan sa pagresponde.
Dugang pa ang kahinungdanon sa pagmentinar nga accessible ang mga dalan, ilabi na sa panahon sa emerhensya. Gihangyo ang publiko nga likayan ang illegal parking tungod kay mahimo kini nga dakong babag sa mga ambulansya, fire truck ug uban pang emergency vehicles.
Photo courtesy: Jhon Carl Balanza/ City Information Office
