Gipahugtan karon ni LTO Region XI Regional Director Atty. Ernesto Raphael V. Robillo ang pagpatuman sa traffic laws batok sa mga overloaded tricycle ug uban pang traffic violations duol sa mga eskwelahan o school zone sa tibuok Davao Region, aron masiguro ang kaluwasan sa mga estudyante.
Ubos sa Memorandum Order No. LTO-XI-2026-M-008 nga gipagawas niadtong Agosto 4, 2026, gimandoan ang mga LTO District Office, lakip ang LTO R-XI Tagum District Office nga gidumalaan ni Officer In-Charge/TRO II Karen Mae D. Torollo, MPA, nga palig-onon ang enforcement ug traffic assistance sa mga strategic school areas, ilabina sa oras sa pagsulod ug paggawas sa mga estudyante.
Gipakusgan ang maong direktiba human nasaksihan ni DepEd Region XI Director Maria Ines C. Asuncion ang mga overloaded tricycle nga nagkarga og mga estudyante sa Madaum Highway sa Tagum City, Davao del Norte.
Gimandoan usab ang law enforcement units, PNP-deputized agents ug local government officials nga magpadayon sa high-visibility operations sa palibot sa mga eskwelahan.
Hugot nga ipatuman usab ang mga balaod batok sa passenger overloading, reckless driving ug uban pang traffic violations nga makapahimutang sa mga estudyante sa peligro.
Gipasiugda usab sa LTO Region XI ang koordinasyon tali sa mga eskwelahan, transport organizations ug barangay officials aron mapadayon ang kaluwasan sa mga ruta padulong ug palibot sa mga tulunghaan.
