Nabungkag ang usa ka drug den sa Prk. Bougainvillea, Brgy. Magugpo North, Tagum City, Davao del Norte niadtong nakalabay nga adlaw, pinaagi sa mga sakop sa Philippine Drug Enforcement Agency (PDEA), uban sa koordinasyon sa Coastguard Intelligence Group Southeastern Mindanao.
Giila ang maong drug maintainer nga si alyas JR, 38 anyos, kasado, habal-habal driver ug ang ka live niini nga si alyas Jessa, 27 anyos. Lakip usab nga nasikop nga adunay nakuhang nagkadaiyang pakete sa gituohang iligal nga droga ang upat (4) ka mga bisita niini nga sila alyas Gaga, taga Mankilam, Dodong residente sa Carmen Davao del Norte, Jonas taga Braulio E. Dujali Davnor, ug Rico, taga Panabo City.
Nasakmit sa maong operasyon ang 16 ka nagkadaiyang gidak-on sa pakete nga dunay sulod sa gituohang iligal nga droga nga adunay gibana-banang gibug-aton nga 27 gramos ug adunay Standard Value nga P183,600, buy-bust money, ug mga drug paraphernalia.
Gikatakdang mag-atubang og mga kasong paglapas sa Republic Act 9165 kon Comprehensive Dangerous Drugs Act of 2002 ang mga dinakpan kinsa kasamtangan pang anaa sa kamot sa PDEA alang sa mga legal nga proseso ug tukmang dokumentasyon.
