Dakpan sa mga otoridad ang usa ka negosyante nga giilang “priority drug target” human kini mapaliti og gidudahang shabu atol sa gikasang buy-bust operation sa San Miguel Municipal Police Station karong adlawa, Agosto 6, 2026.
Giila ni Police Major Joemel L. Maquiling, hepe sa kapulisan sa San Miguel, ang suspek sa alyas nga “Dodong,” minyo, ug residente sa Purok Tambis, Barangay Purisima, lungsod sa Tago, Surigao del Sur. Si Dodong nalista isip usa ka Newly Identified Street Level Individual (NSLI) ug giisip nga usa sa mga nag-unang target sa kampanya batok sa ilegal nga droga sa maong lungsod.
Nakuha gikan sa posisyon sa suspek ang tulo ka heat-sealed transparent plastic sachet nga adunay sulod nga gidudahang shabu nga motimbang og kapin kun kulang usa ka gramo. Sumala sa Dangerous Drugs Board (DDB), nga nagkantidad og ₱6,800.00.
Kasamtangan karong anaa sa kustodiya sa San Miguel MPS ang suspek uban ang mga nakumpiskang ebidensya alang sa saktong disposisyon ug imbentaryo.
Photo courtesy: San Miguel MPS
