Gipailawom sa surprise drug testing ang mga kapulisan sa Tagum City Police Station kagahapong adlawa Huwebes, Agosto 6, 2026, isip kabahin sa padayon nga kampanya sa Philippine National Police (PNP) batok sa paggamit og ilegal nga droga sulod sa hanay sa kapulisan.
Gipahigayon ang maong kalihokan sa estasyon nga gipangunahan sa City Anti-Drug Abuse Council (CADAC) sa pakigtambayayong sa Philippine Drug Enforcement Agency (PDEA), Department of the Interior and Local Government (DILG), PNP Tagum, City Health Office (CHO), ug Provincial Health Office (PHO).
Sumala sa PNP, ang kalit nga drug testing kabahin sa ilang programa aron mapadayon ang integridad, disiplina, ug propesyonalismo sa tanang mga kapulisan, ingon man pagsiguro nga drug-free ang organisasyon.
Gituohan usab nga pinaagi sa maong inisyatibo, mas mapalig-on ang pagsalig sa katawhan sa kapulisan ug masiguro ang responsableng pagpatuman sa ilang katungdanan alang sa pagmintinar sa kalinaw ug kahapsay sa komunidad.
Photo Courtesy: City Government of Tagum
