Nasikop sa mga operatiba sa Regional Anti-Cybercrime Unit 13, uban sa mga kapulisan lalaki ug babae sa managlahing operasyon tungod sa kasong “Cyber Libel”, sa Caraga Region.
Sikop ang usa ka lalaking giila sa alyas “Mako” pinaagi sa usa ka Warrant of Arrest. Ang pagdakop nahitabo alas 9:15 sa buntag sa ubos sa pagpangulo ni PCOL Lemuel B. Gonda, Regional Chief sa RACU-13.
Ang suspetsado giatubang sa kasong paglapas sa Cybercrime Prevention Act of 2012 (RA 10175), Cyber Libel ubos sa Section 4(c)(4) nga may kalabutan sa Article 355 sa Revised Penal Code.
Gitakda sa korte ang rekomendadong piyansa nga ₱80,000 alang sa temporaryong kagawasan sa akusado. Samtang dakpan usab sa kapulisan ang usa ka 48-anyos nga babaye nga giila sa alyas “Lanie” atol sa pagdakop sa mga operatiba sa (RACU-13) uban sa Provincial Intelligence Unit pinaagi sa usa ka Warrant of Arrest.
Ang suspetsado giatubang og kaso sa Estafa ubos sa Artikulo 315, Parapo 2(a) sa Revised Penal Code nga may kalabutan sa Section 6 sa Republic Act 10175 o Cybercrime Prevention Act.
Sumala sa kapulisan, adunay rekomendadong piyansa nga P24,000.00 alang sa temporaryong kagawasan sa akusado samtang nagpadayon ang paghusay sa kaso sa korte.
Gipahinumdoman usab sa RACU-13 ang publiko nga magmatngon ug responsable sa paggamit sa social media ug uban pang online platforms pinaagi sa ilang kampanya nga “Think Before You Click.”
