Mokabat sa 56,059 ka poor ug near-poor nga panimalay sa Negros Island Region ang nakadawat na og ₱2,000 nga cash assistance matag usa ubos sa Unified Package for Livelihood, Industry, Food, and Transport Assistance (UPLIFT) Program, diin mikabat sa ₱112,118,000 ang kinatibuk-ang kantidad sa ayuda nga gipang-apod-apod hangtod Agosto 5, 2026.
Ang Department of Social Welfare and Development Field Office Negros Island Region (DSWD NIR), uban ang koordinasyon sa mga Local Government Units (LGUs), mga opisina sa mga district representative, ug uban pang partner agencies, nagpadayon sa sunod-sunod nga payout para sa Group 2 beneficiaries sa tibuok rehiyon.
Gipatin-aw sa DSWD NIR nga ang maong ayuda kabahin sa direktiba ni Presidente Ferdinand R. Marcos Jr. nga paspason ang paghatag sa UPLIFT cash assistance ngadto sa mga kwalipikadong Pilipino. Ang mga benepisyaryo giila pinaagi sa Community-Based Monitoring System (CBMS) aron masiguro nga ang pinansyal nga suporta makaabot sa tukmang mga panimalay nga nanginahanglan.
Gipahinumdoman usab sa ahensya ang mga benepisyaryo nga bisan kinsang kwalipikadong miyembro sa ilang pamilya nga nalista sa family roster mahimong mo-claim sa ayuda, basta dili menor de edad. Wala na usab kinahanglana ang authorization letter kung ang kwalipikadong miyembro mismo ang moadto aron modawat sa cash assistance.
Nagpadayon ang DSWD NIR sa pakigtambayayong sa mga lokal nga panggamhanan ug partner agencies aron mas mapaduol ang serbisyo sa mga pamilya ug masiguro nga ang tabang mahatag sa mga sektor nga labing nanginahanglan.
