Giduso ni Senador Robinhood “Robin” Padilla ang administrasyon nga unahon ang pagsulbad sa problema sa suplay sa kuryente ug transportasyon sa nasud una pa ipadayon ang plano sa paglunsad og rocket ngadto sa kalawakan sa 2027. Sa iyang Kontra-SONA sa Senado, iyang giingon nga mas kinahanglan nga matubag una ang adlaw-adlaw nga panginahanglan sa mga Pilipino.
Matod ni Padilla, ang mga lokal nga panggamhanan o LGU kinahanglan hatagan og mas dakong kagawasan sa pagdumala sa mga proyekto sa enerhiya aron dali masulbad ang kanunay’ng brownout ilabina sa mga hilit nga lugar sama sa Bicol Region. Gihangyo usab niya ang pagpahapsay sa mga proseso sa pagtukod og mga planta sa kuryente aron mapadali ang pagpalambo sa suplay sa elektrisidad.
Gipasiugda usab sa senador ang panginahanglan sa mas maayong sistema sa transportasyon, ilabina sa Bicol diin hangtod karon mokabat gihapon og 12 ka oras ang biyahe gikan sa Metro Manila. Bisan og iyang gisuportahan ang plano sa gobyerno nga maglunsad og rocket sa 2027, iyang giingon nga mas angay unahon ang mga proyekto sama sa bullet train aron mapadali ang pagbiyahe sa katawhan. Gisuportahan usab ni Padilla ang Freedom of Information Bill ug ang gisugyot nga pagdili sa paggamit sa social media alang sa mga menor de edad.
Photo Courtesy:Wikipedia
