Nagpadayon ang Department of Social Welfare and Development (DSWD) Field Office XII pinaagi sa Disaster Response Management Division (DRMD) sa paghatag og Emergency Cash Transfer (ECT) ngadto sa mga pamilyang naapektuhan sa magnitude 7.8 nga linog niadtong Hunyo 8, 2026.
Ang payout nga gipahigayon sa lungsod sa Polomolok, South Cotabato, kapin 2,200 ka mga benepisyaryo ang nakadawat og pinansyal nga tabang isip kabahin sa padayon nga suporta sa gobyerno alang sa ilang pagbangon gikan sa kadaot sa linog.
Lakip sa mga nakadawat ang 1,906 ka pamilya nga adunay partially damaged houses, diin matag usa nakadawat og ₱5,175, samtang 298 ka pamilya nga adunay totally damaged houses ang gihatagan og ₱10,350 matag panimalay.
Matod sa DSWD, ang maong ayuda gituyo aron makatabang sa pagtagbo sa mga nag-unang panginahanglan sa mga apektadong pamilya ug pagsugod sa pag-ayo sa ilang mga puluy-anan.
Ang Emergency Cash Transfer usa sa mga programa sa DSWD nga nagtumong sa paghatag og dali nga pinansyal nga suporta sa mga biktima sa kalamidad aron matabangan sila samtang nagpadayon ang ilang pagbangon.
Nagpadayon usab ang DSWD Field Office XII sa pakigtambayayong sa lokal nga panggamhanan sa Polomolok ug uban pang mga ahensya aron masiguro ang hapsay, paspas, ug episyenteng paghatod sa ayuda ngadto sa tanang kwalipikadong benepisyaryo.
Photo Courtesy: DSWD Field Office 12
