Nadakpan ang 27-anyos nga lalaki giilang High-Value Individual (HVI) sa gipahigayon nga joint drug buy-bust operation sa Purok 1, Barangay Colonia, Valencia City, Bukidnon kagahapon Hulyo 27, 2026.
Ang maong operasyon pinaagi sa hiniusang pwersa sa mga elemento sa Provincial Drug Enforcement Unit, Valencia City Police Station, 2nd Provincial Mobile Force Company, Provincial Intelligence Unit, ug City Anti-Drugs Special Unit Team (CADSUT).
Nasakmit gikan sa suspetsado ang gituohang shabu motimbang sa 80.5 gramos ug adunay gibanabanang Standard Drug Price nga ₱547,400.00.
Gidala na ang tanang nakumpiskar nga ilegal nga droga sa Bukidnon Provincial Forensic Unit alang sa qualitative ug quantitative examination.
Sa karon ang nadakpan nga suspek nakakostudiya sa pasilidad sa Valencia CPS alang sa dokumentasyon ug saktong disposisyon, samtang giandam na sa kapulisan ang ipasaka nga kasong paglapas sa Sections 5 ug 11, Article II sa Republic Act 9165 (Comprehensive Dangerous Drugs Act of 2002) batok kaniya.
Photo Courtesy: Valencia City Police Station
