Gidakop ang usa ka 15-anyos nga menor de edad sa kapulisan human sa pagpamusil nga nahitabo atol sa Bite of Seattle Food Festival sa Seattle, Washington, USA.
Sumala sa mga otoridad, tulo ka tawo ang namatay sa insidente, lakip ang usa ka 56-anyos nga babaye, usa ka 19-anyos nga lalaki, ug usa ka 44-anyos nga lalaki, samtang usa usab ka bata ang naospital human maangin sa pinusilay.
Base sa imbestigasyon, gituohang adunay labing menos tulo ka mga armado nga nalambigit sa insidente. Lakip niini ang 15-anyos nga gidakop, ug usa pa ka wala mailhing suspek nga padayon pang gipangita sa mga awtoridad.
Gituohang nagpinusilay ang mga armado hinungdan sa daghang inosenteng sibilyan nga naigo. Sumala sa Seattle Police, labing menos pito hangtod walo ka tawo ang naangin sa crossfire.
Nagpadayon ang imbestigasyon aron mailhan ug madakpan ang ubang suspek, ug gihangyo sa kapulisan ang publiko nga motabang pinaagi sa paghatag og impormasyon may kalabotan sa nahitabong insidente.
Photo Courtesy: Time
