Kapin 1,700 ka mga establisyemento ang nadakpan sa nasudnong operasyon sa Bureau of Internal Revenue (BIR) ubos sa Tax Compliance Verification Drive nga gipahigayon niadtong Hulyo 20. Sa maong operasyon, gisusi ang 3,590 ka mga establisyemento nga namaligya ug sigarilyo, vape ug heated tobacco products diin 1,793 ang nasuta sa paglapas sa excise tax.
Nasakmit usab ang 8,634 ka vape products ug 22,251 ka pakete sa sigarilyo nga adunay gibanabana nga ₱16.54 milyon nga tax liability. Lakip sa mga paglapas ang walay rehistro sa BIR, walay pag-isyu og resibo o invoice, walay rehistradong libro sa accounts, ug walay Certificate of Registration.
Nadiskubre usab ang mga produkto nga walay opisyal nga BIR tax stamps. Matod ni BIR Commissioner Charlito Martin R. Mendoza, padayon nga ipatuman sa BIR ang patas ug lig-on nga paagi sa buhis aron mapanalipdan ang mga negosyanteng nagtuman sa balaod.
Ang nationwide operation kabahin sa Revenue Collection ug Revenue Base Protection agenda sa BIR ilawom sa programang BIR DARES, nga nakabase sa prinsipyo sa “Assistance First to Comply. Enforcement Only When Necessary.”
Photo Courtesy: Slate.com
