Usa ka makaguol nga panghitabo ang nipukaw sa dakbayan sa Malaybalay kagahapong adlawa Hulyo 27, 2026 human napalgan sa usa ka sagbotan sa Barangay 1 ang patayng lawas ni Nilbert “Betty” Benito, usa ka miyembro sa LGBTQ+ community sa maong dapit.
Nakit-ang adunay mga bun-og ug samad sa ulo ang biktima nga gitan-aw sa mga awtoridad ug paryente nga maoy pangunang hinungdan sa iyang kamatayon, samtang padayon usab nga gisusi sa mga imbestigador ang mga taho ug impormasyon bahin sa posibleng sexual assault bisan wala pa kini pormal nga gipamatud-an.
Sa usa ka pakighinabi sa Juander Radyo Malaybalay, gipadayag sa amahan sa biktima nga si Hermin Benito nga bisan pa sa dakong kasakit sa ilang pamilya, wala siya nagtanom og pagdumot batok sa suspek.
Gipili sa amahan nga mas gusto niyang maatubang ug madungog ang pagpangayo og pasaylo sa responsable kaysa sa pagpasaka sa kaso, samtang naglaom gihapon ang tibuok pamilya nga magpadayon ang imbestigasyon sa kapulisan aron mailhan ug mapaatubang sa hustisya ang tinuod nga naghimo sa maong krimen.
