Gimanduan ni Provincial Governor Rogelio Neil P. Roque ang gimugna nga Red-Striped Soft Scale Insect (RSSI) Technical Working Group (TWG) sa pagpatuman sa hugot nga surveillance, pagmonitor, ug field response batok sa padayong hulga sa pesteng RSSI sa mga katubhan sa Bukidnon.
Ubos sa Executive Order No. 30, s. 2026, ang maong TWG—nga pagapangunahan sa Provincial Agriculture Office (PAgrO) ug Sugar Regulatory Administration (SRA)—maglihok isip operational arm sa pag-edukar sa mga mag-uuma ug pagtubag dayon sa mga field validation.
Kini nga lakang gitumong aron mapanalipdan ang industriya sa tubo sa Bukidnon, nga usa sa mga nag-unang prodyuser ug tighatag og asukal sa buong Rehiyon 10.
Ang RSSI giila nga seryosong hulga tungod kay mosuyop kini sa duga sa tubo, nga direktang nagdaot sa kalidad ug nagpaubos sa gidaghanon sa ani sa mga lokal nga mag-uuma.
Aron masiguro ang pondo, teknikal nga suporta, ug logistical resources sa maong programa, giumol usab sa gobernador ang RSSI Steering Committee nga pagapangunahan sa Bukidnon Mill District Development Council isip Vice Chairperson.
Makig-alayon sa komite ang nagkalainlaing ahensya ug sector sama sa DA-RFO 10, Crystal Sugar Milling Company, BUSCO, PDRRMO, PBO, ug ang mga mayor sa mga lungsod nga nag-unang naghimo og asukal sa probinsya
Photo Courtesy:Serbisyo PH
