Gipahibalo ni President Ferdinand Marcos Jr. nga hapit na ipasaka ang nagkadaiyang kaso batok kang kanhi House Speaker Martin Romualdez kalabot sa giimbestigahang korapsyon sa mga flood control projects.
Atol sa iyang ikalimang State of the Nation Address (SONA), giingon ni Marcos nga sumala sa Office of the Ombudsman, andam na ang pagpaila sa mga kaso. Giangkon usab niya nga bisan ig-agaw niya si Romualdez, kinahanglan gihapon nga sundon ang hustisya.
Matud pa sa Presidente, dili siya presidente sa iyang pamilya o sa iyang mga higala, kondili Presidente sa tanang Pilipino, ug ang iyang katungdanan mao ang pagserbisyo sa katawhan.
Gibutyag usab ni Marcos nga gibana-bana nga ₱25 bilyon nga mga kabtangan nga nalambigit sa maong kontrobersiya ang na-freeze, ug kapin ₱800 milyon niini ang naibalik na sa kaban sa nasud.
Dugang pa niya, ang imbestigasyon gipadayon sa Office of the Ombudsman ug sa national prosecution service, samtang nagpatuman usab ang gobyerno og mga reporma sa Department of Public Works and Highways (DPWH) aron mapalig-on ang transparency ug malikayan ang overpricing sa mga proyekto sa gobyerno.
Sa laing bahin, miingon si Romualdez nga iyang gitahod ang pahayag sa Presidente. Matud pa niya, andam siyang moatubang sa legal nga proseso ug mopakita sa ebidensya aron pamatud-an nga wala siya makalapas sa balaod.
Photo Courtesy: Philippine News Agency
