Nagdonar ang BSP Employees Association Inc. (BSPEAI) og dul-an sa 100 ka armchair nga gihimo gikan sa gi-recycle nga mga polymer banknotes nga dili na angay gamiton sa sirkulasyon ngadto sa Doña Pilar L. Marfori Elementary School sa dakbayan sa Davao.
Gihimo ang ceremonial turnover ni BSP Deputy Governor Mamerto Tangonan, BSP Mindanao Regional Office Officer-in-Charge Jason Capocao, BSPEAI President Brent Lucero, ug Currency Policy and Integrity Department Director Eloisa Glindro niadtong Hulyo 22.
Ang mga armchair kabahin sa Banknote-to-Armchair Project, usa ka programa nga nag-usab sa mga daan ug dili na magamit nga polymer banknotes ug mga nahibiling materyales sa paghimo niini ngadto sa lig-on nga armchair alang sa mga eskwelahan.
Sumala sa BSP, mas lig-on, mas limpyo ug mas malungtaron ang polymer banknotes kumpara sa papel nga kuwarta. Gani, gikan sa 2022 hangtod Mayo 2026, 0.02 porsyento lamang sa polymer ₱1,000 banknotes ang naibalik tungod sa pagkadaot, samtang 54.75 porsyento sa papel nga ₱1,000 banknotes ang nanginahanglan og pag-ilis sa maong panahon.
Dugang pa sa BSP, wala pa usab sila makadawat og mga ubos nga denominasyon sa polymer banknotes nga dili na magamit sukad kini unang gipagawas niadtong Disyembre 2024.
Photo Courtesy: iTech Solution
