Patay ang usa ka 22-anyos nga lalaki human maaksidente ang iyang gimanehong motorsiklo nga nadasmag sa nakaparadang Fuso Trailer Truck, sa National highway, Km 4, Barangay Luna, dakbayan sa Surigao, niadtong nakalabay nga adlaw.
Sa inisyal nga imbestigasyon sa Surigao Component City Police Station, nagbiyahe ang biktima sakay sa usa ka puti nga Honda Click 125 uban sa 26-anyos nga back rider padulong sa Barangay Luna proper.
Gituohang kusog ang dagan sa motorsiklo dihang kalit kining misimang sa tuo nga bahin sa dalan ug mibangga sa likod nga bahin sa usa ka puti nga Fuso trailer truck nga puno sa mga sako sa semento ug giparking niadtong higayona.
Kahibaloan nga nalagpot ang back rider, samtang ang drayber sa motor ug ang motorsiklo nadasok ilalom sa likod nga bahin sa Fuso Truck. Gidala dayon sa QART personnel ang duha ka biktima ngadto sa Caraga Regional Hospital alang sa medikal nga pag-atiman.
Apan, gideklara sa attending physician nga dead on arrival ang 22-anyos nga motorista. Giimbestigahan na sa kapulisan ang disgrasya samtang ang patayng lawas sa biktima anaa sa ospital alang sa hustong disposisyon.
