Gilauman nga ipadayag ni Pangulong Ferdinand Marcos Jr. ang mga nahimo sa iyang administrasyon sa niaging tuig ug ang mga prayoridad nga balaodnon sa iyang ika-limang State of the Nation Address (SONA) karong adlawa Hulyo 27. Sumala sa Malacañang, magsilbi kining taho sa nasod bahin sa mga kalampusan sa kagamhanan ug mga gipadayag nga plano uban sa Kongreso alang sa nahabilin nga duha ka tuig sa iyang termino.
Gikumpirma usab ni Presidential Communications Office (PCO) Secretary Dave Gomez nga ang Pangulo mismo ang nagsulat sa iyang diskurso gikan sa mga taho sa nagkadaiyang ahensya, ug padayon pa kini niyang gihapsay aron mahimong hingpit sa wala pa ang SONA.
Tuyo sa SONA nga ipahibalo sa publiko ang mga nahimo sa gobyerno ug kon giunsa niini pag-atubang ang nagkalainlaing hulga ug leksyon sa ekonomiya. Bisan pa man niini, wala gihapon gipadayag sa Malacañang kon hisgotan ba sa Pangulo ang kontrobersiya bahin sa alegasyon sa anomaliya sa mga flood control projects ug ang impeachment trial batok kang Bise Presidente Sara Duterte. Ang tibuok programa gidisenyo nga simple apan dungganon, diin ang Radio Television Malacañang ang manguna sa produksyon ug ang PCSO Chorale ang moawit sa pambansang awit.
Aron masiguro ang hapsay ug malinawong pagpahigayon sa SONA, nagpagawas og direktiba si Executive Secretary Ralph Recto sa tanang ahensya sa gobyerno nga pahugtan ang seguridad, traffic management, crowd control, ug emergency response. Gipahinumdoman ni Recto ang tanan nga kinahanglang andam, magkatambayayong ang lihok, ug paspas ang pagtubag sa bisan unsang sitwasyon aron maseguro nga mahimong malinawon ang dako nga kalihokan alang sa tanan.
Photo courtesy: Philippine News Agency
