Gideklarang sa Guinness World Records nga ang tulo ka magsoong babaye gikan sa Brazil mao na karon ang pinakatigulang nga buhi nga trio sa tibuok kalibutan.
Giila ang maong mga magsoon mao sila si Levita de Deus Nunes, 109 years old; Zoraide de Deus Mota, 104 years old; ug Zulina de Deus Nunes, 103 years old. Ang ilang hiniusang edad miabot na sa 316 ka tuig ug 302 ka adlaw, nga gipamatud-an usab sa longevity research organization nga LongeviQuest.
Nagpuyo ang tulo sa Rio de Janeiro, Brazil, ug matud pa nila, ang sekreto sa ilang taas ug himsog nga kinabuhi mao ang pagpadayon sa adlaw-adlaw nga rutina, pagpabiling aktibo, ug lig-on nga panaghiusa isip pamilya.
Si Levita nagtrabaho kaniadto isip usa ka craftswoman ug sa ulahi nahimong empleyado sa usa ka television network. Si Zoraide nahimong nars ug nakapadako og lima ka anak, samtang si Zulina usa ka housewife nga nakapadako usab og unom ka anak.
Sulod sa kapin usa ka siglo, nasaksihan sa tulo ka magsoon ang daghang mahinungdanong panghitabo sa kasaysayan samtang nagpadayon ang ilang panag-uban isip pamilya.
Tungod sa ilang talagsaong edad, nakadani usab kini og interes sa mga siyentista. Sa karon, gitun-an sila sa DNA Longevo Project sa University of São Paulo ubos sa pagpanguna sa geneticist nga si Mayana Zatz, aron masabtan kung unsay hinungdan sa ilang taas ug himsog nga kinabuhi.
Bisan pa sa mga siyentipikong pagtuon, alang sa tulo ka magsoon, ang tinuod nga sekreto sa taas nga kinabuhi nagpabilin nga yano ug disiplinadong rutina, kanunay nga paglihok sa lawas, ug ang pag-uban sa mga minahal sa kinabuhi.
Photo Courtesy: Guiness World Records
