Gipalig-on sa Probinsyal nga Gobyerno sa Surigao del Sur ang industriya sa kape ug seaweed pinaagi sa pagpirma sa usa ka Memorandum of Agreement (MOA) uban sa Department of Agriculture (DA), ubang nasyonal nga ahensya, lokal nga panggamhanan (LGUs), ug pribadong sektor niadtong Hulyo 23 sa Governor’s Conference Room sa Provincial Capitol.
Ubos sa liderato ni Governor Johnny T. Pimentel, nga girepresentahan ni Acting Governor Manuel O. Alameda Sr., ang maong kasabutan nagtumong sa pagpapaspas sa modernisasyon sa agrikultura ug pagpalambo sa panginabuhian sa mga mag-uuma ug seaweed farmers pinaagi sa lig-on nga kooperasyon tali sa gobyerno ug pribadong sektor.
Atol sa programa, gipresentar nila Mr. Darwin P. Patriarca, Provincial Coffee Focal, ug Ms. Lucille B. Tero, Provincial Seaweed Focal, ang mga roadmap ug mga inisyatibo alang sa dugang nga pagpalambo sa duha ka industriya.
Sumala sa datos sa Philippine Statistics Authority (PSA) alang sa 2025, ang Surigao del Sur mao ang nanguna sa produksiyon sa kape sa tibuok Caraga Region, nga adunay 2,450 ka ektarya nga gitamnan ug nakarekord og 732.8 metric tons nga produksyon.
Gibutyag usab nga ang Pilipinas nagpabiling ika-upat sa labing dagkong prodyuser sa seaweed sa kalibotan, sumala sa Food and Agriculture Organization (FAO), diin nakamugna ang nasud og 1.516 milyon ka tonelada, katumbas sa 4.2 porsiyento sa kinatibuk-ang global nga produksiyon.
Pinaagi sa maong kasabutan, gilauman nga mas mapataas ang produktibidad, mapalambo ang kalidad sa mga produkto, ug mapalig-on ang panginabuhian sa mga mag-uuma ug mananagat, samtang gipadayon ang inklusibo ug malungtarong pagtubo sa ekonomiya sa lalawigan.
Human sa pormal nga pagpirma sa MOA ug pagbayloay sa mga kopya sa kasabutan, itutok na sa lalawigan ang mga sunod nga lakang alang sa public-private partnerships ug value-adding processing aron mapadako ang bili sa mga lokal nga produkto ug mapalapad ang merkado niini.
Gilauman usab nga pinaagi sa padayon nga suporta sa gobyerno ug sa paborableng klima sa rehiyon, mas maduol ang Surigao del Sur sa pagkab-ot sa tumong nga opisyal nga mailhan isip “Coffee Capital of Caraga,” nga maghatag og dugang oportunidad sa mga mag-uuma, mamumuhunan, ug sa lokal nga ekonomiya.
Photo Courtesy: PhilAtlas
