Posible diay nga ang kanunay nga sobra nga pagkaon ug pag-inom og mga tam-is mahimong hinungdan sa pagkalagas sa buhok ug mas taas nga posibilidad sa pagka-opaw.
Base sa pipila ka mga pagtuon, ang taas nga lebel sa asukal sa lawas mahimong mosangpot sa insulin resistance, nga mahimong makaapekto sa maayong pagdaloy sa dugo ug sustansya paingon sa mga hair follicles, nga importante sa himsog nga pagtubo sa buhok.
Gawas niini, ang sobra nga asukal mahimo usab nga makaapekto sa balanse sa mga hormone sa lawas, nga mahimong usa sa mga hinungdan sa pipila ka matang sa pagkalagas sa buhok.
Apan, gipasabot sa mga eksperto nga dili lamang ang tam-is ang hinungdan sa pagka-opaw. Mahimo usab kini tungod sa heredity o panulondon, edad, stress, hormonal changes, ug uban pang kondisyon sa panglawas.
Busa, aron mapadayon ang maayong kahimsog ug mapamenosan ang risgo sa pagkalagas sa buhok, girekomenda ang balanse nga pagkaon, regular nga ehersisyo, ug pagkonsulta sa doktor kon grabe o kalit nga pagpanglarot sa buhok.
