Giklaro sa Philippine Postal Corporation nga dili kinahanglan adunay daan nga balido nga government-issued ID ang usa ka aplikante aron makakuha og Postal ID.
Matod ni Postmaster General ug CEO Maximo Sta. Maria III, ang mga first-time applicant kinahanglan lamang mopasa og birth certificate, barangay certificate o laing balidong pamatuod sa address, ug pag-fill-up sa Postal ID application form.
Kung walay barangay certificate, mahimo usab gamiton ang bag-ong resibo sa kuryente, tubig, internet, o uban pang utility bill nga nagpakita sa ngalan ug kasamtangang adres sa aplikante.
Gihimo sa PHLPost ang maong pagpasabot aron wagtangon ang sayop nga pagtuo nga kinahanglan una adunay lain nga valid government-issued ID sa dili pa makakuha og Postal ID.
Ang Postal ID mahimong gamiton sa daghang transaksyon sa publiko ug pribadong sektor, lakip ang pag-abli og bank account, pag-aplay og pasaporte, pag-claim og parcel, ug uban pang legal ug pinansyal nga transaksyon.
Photo Courtesy: Philippine News Agency
