Gipasalig sa Department of Energy (DOE) nga masulbad ang problema sa suplay sa kuryente sa Visayas sa dili pa matapos ang termino ni Presidente Ferdinand Marcos Jr. sa 2028.
Matud ni Energy Secretary Sharon Garin, nag-andam ang ahensya og master plan alang sa Mindoro, Palawan ug Visayas nga maglangkob sa power generation, transmission ug distribution aron mapalig-on ang suplay sa kuryente sa maong mga lugar.
Gipasabot ni Garin nga naapektuhan ang Visayas sa nagkadaiyang panghitabo sama sa El Niño, mga bagyo ug uban pang wala damhang sitwasyon nga maoy hinungdan sa kakulang sa suplay sa kuryente ug nagpadayon nga yellow ug red alerts sa power grid.
Bisan pa niini, giingon sa opisyal nga adunay pipila ka bag-ong power plants nga gilauman nga magsugod og operasyon sa dili pa ang 2028 aron mapalig-on ang suplay sa kuryente sa rehiyon.
Samtang gipaabot ang mga long-term nga proyekto, nagplano usab ang DOE nga magdugang og 200 megawatts nga Battery Energy Storage Systems (BESS) isip temporaryong solusyon aron makatabang sa pagpakunhod sa mga brownout ug pagpalig-on sa suplay sa kuryente sa Visayas.
Photo Courtesy: SourceNM
