Gipadayag ni Chinese Ambassador to the Philippines Jing Quan nga ang pagpagawas sa *China Daily* og video nga hinimo gamit ang Artificial Intelligence (AI) diin gihulagway ang mga Pilipino isip mga unggoy walay kalambigitan sa gobyerno sa China.
Sa usa ka pahayag nga gipaambit sa media niadtong Martes, Hulyo 21, miingon si Jing Quan nga ang pagpagawas sa maong video usa lamang ka “aksyon sa media” ug walay labot ang gobyerno sa China niini. Nakakuha ang maong video og mga reaksyon, komento, ug pagsaway gikan sa mga senador ug mga ahensya sa gobyerno.
Kahinumdoman nga ang maong video usa sa mga gipaabot nga hisgutan tali sa Chinese ambassador ug ni Presidente Ferdinand “Bongbong” Marcos Jr., human gipatawag sa Presidente ang embahador sa Palasyo niadtong Martes sa hapon, Hulyo 21.
Apil usab sa hisgutan ang pag-atake sa Chinese Coast Guard (CCG) sa Ayungin Shoal niadtong Lunes, Hulyo 20, diin gikatahong naangol ang usa ka sakop sa Philippine Navy (PN).
Photo Courtesy:www.asiae.ko.kr
