Nagtuo si MP Promotions CEO Jas Mathur nga magpabiling dako nga atraksyon sa mga boxing fans ang gipaabot nga rematch nila Manny Pacquiao ug Floyd Mayweather Jr., bisan pa og nausab ang iskedyul niini ngadto sa Enero sa sunod tuig.
Matud ni Mathur, dako ang iyang pagsalig nga mahimong malampuson ug makapagtala pag-usab og rekord ang ikaduhang panag-atbang sa duha ka boxing legends tungod kay daghan gihapon ang gustong makakita sa ilang rematch.
Giingon usab niya nga ang Pacquiao-Mayweather rematch mahimong usa sa labing dagkong sporting events sa panahon sa streaming era.
Hinumdoman nga ang ilang rematch gipahibalo karong tuiga apan gibatikos sa pipila ka boxing analysts ug fans nga nagduhaduha kung makab-ot ba niini ang sama ka dakong interes nga nakuha sa ilang unang panag-away niadtong 2015.
Sa ilang unang panagtagbo, midaog si Mayweather pinaagi sa unanimous decision, apan daghan ang nabitin tungod sa depensibong estilo sa away nga wala makatuman sa taas nga ekspektasyon sa mga fans.
Bisan pa man nga hapit na mag-50 anyos si Mayweather ug 48-anyos si Pacquiao sa oras sa rematch, nagtuo si Mathur nga dili kini mahimong babag tungod sa ilang dakong ngalan ug impluwensya sa kalibutan sa boxing.
Photo Courtesy: Netflix
