Gipagawas sa Bureau of Internal Revenue (BIR) ang bag-ong mga giya sa pagpatuman sa creditable withholding tax alang sa wholesale purchases aron matubag ang kalibog sa industriya ug mapahiusa ang pagsunod sa mga dagkong corporate buyers ug manufacturers.
Ubos sa Revenue Memorandum Circular (RMC) No. 79-2026 nga gipatik niadtong Hulyo 20, gipatin-aw sa BIR ang pagpatuman sa Revenue Regulations No. 24-2025, lakip ang mga tubag sa mga pangutana bahin sa paggamit sa paborableng 0.5% creditable withholding tax sa wholesale transactions nga naglakip sa Top Withholding Agents, direct importers, ug manufacturers.
Sumala sa BIR, ang 0.5 % tax rate magamit kung ang nagbaligya ang manufacturer o direct importer nga nagbaligya og mga produkto alang sa wholesale, bisan pa man kung ang pumapalit mogamit niini alang sa pagbaligya pag-usab o alang sa kaugalingong gamit.
Ang mga lokal nga manufacturers nga nagprodyus ug nagbaligya sa mga sakop nga produkto ug ang mga direct importers nga nagbaligya sa lokal nga merkado kwalipikado usab niini. Samtang, ang mga transaksiyon nga giklasipikar isip retail magpabiling sakop sa kasagarang 1% withholding tax.
Gitubag usab sa giya ang mga isyu nga may kalabotan sa motor vehicles, pharmaceutical products, ug liquid ug solid fuels. Ang mga fully assembled vehicles, semi-knocked down units, ug completely knocked down units mahimong sakop sa 0.5% rate kung ibaligya kini sa normal nga dagan sa negosyo.
Alang sa pharmaceutical products, ang paborableng rate magamit lamang sa mga produktong giila isip tambal sa Food and Drug Administration. Gipahimangnoan usab sa BIR ang mga kompanya nga usbon dayon ang ilang accounting systems, procurement workflows, ug tax compliance procedures aron masiguro ang hustong pagpatuman sa bag-ong mga lagda ug malikayan ang mga sayop sa pag-withhold sa buhis.
Photo courtesy: Philippine News Agency
