Mipadayag sa ilang panglantaw sila Pokwang ug Meryll Soriano bahin sa kontrobersiya nga nalambigit kang Joshua Garcia. Sulod sa duha ka adlaw, nahimong hisgutan sa social media ang aktor human niya gi-repost sa TikTok ang usa ka video nga giingong nag pakitag suporta kang Vice President Sara Duterte.
Bisan og napapas na ang repost, wala pa gihapon mopagawas og pahayag si Joshua. Sa Fast Talk with Boy Abunda niadtong Martes, Hulyo 21, 2026, gipangutana ni Boy Abunda sila Pokwang ug Meryll sa ilang reaksyon sa maong isyu.
Matod ni Meryll, adunay katungod ang matag tawo sa pagpahayag sa ilang kaugalingong baruganan ug opinyon pinaagi sa freedom of speech. Dugang niini giingon nga kung mao kana ang tinuohan ni Joshua, angayan nga respetuhon kini, bisan pa man og adunay laing opinyon ang publiko.
Miuyon usab si Pokwang ug miingon nga dili angay husgahan si Joshua tungod lang kay artista siya. Matod niya, kung ordinaryong tawo pa kini, dili unta kini mahimong dako nga isyu. Gipasiugda usab niya nga bisan lahi-lahi sila og gisuportahan sa iyang mga higala, posible gihapon nga magtinahuray ug magpadayon ang maayong panaghigalaay.
Dugang pa, nahinumdoman usab nga si Pokwang kaniadto nakaagom og daghang online hate tungod sa iyang kaugalingong politikal nga baruganan.
Photo courtesy: Pep.ph
